يوميات عاااااااااااااطل

اليكم احد المواقف اللى بتتكرر كتير مع ابويا من يوم ما اتخرجت وقعدتله فى البيت زى البت البايرة !
طالع اظبط الاريال بتاع التليفزيون الارضى بناءا على تعليمات مشددة من الحاج
المهم لكم مادار بينى وبينى والدى المبجل ....

ابويا : انت هاتدنك قاعدلى على المخروب ده طول النهار كدة
انا : ايه ياحاج فى ايه .. بخلص ليلة كدة وهاقوم
ابويا : ليلة ؟ ... طب قوم اعدل الاريال عشان عايز اشوف نشرة 9
انا : ماهى بتيجى على الفضائية اتفرج عليها
ابويا : لا .. مابفهمش فى ريموت الريسيفر .. مابعرفش اتعامل الا مع ريموت التليفزيون بس !
انا : طاب ثوانى بس ياحاج وجايلك على طول
ابويا : تقوم دلوقتى
انا : ياعمنا هاخلص موضوع كدة واطلع اعملك كل اللى انت عايزه ...
ابويا : انت هاتقوم وتسمع الكلام ولا لأ

***************************
طلعت على السطح وسبت الايميل شغال (نادجات) من البشر اللى انا سبتها وقمت فجأة !
المهم لسه بقول ياهادى فى الاريال لقيت ابويا بيقولى ... يمين شوية !!
انا : هو ايه اللى يمين شوية .. هو انا لسه عملت حاجة ياحاج ؟!!
ابويا : طب اخلص !
انا : كدة مظبوط ؟؟
ابويا : لا قولتلك يمين شوية ..
انا : !!!!!!!!
ابويا : لسه .. لسه ..
انا : هــــــــــــــــــــا .. خلاويص !
ابويا : لســــــــــــــــــــه !
امى بتبص من شباك المطبخ لقيتنى متشعلق على السطح : انت طالع تعمل ايه عندك يا مدهول ؟؟!!
انا : بحلق دقنى !! .. وفى سرى : عيلة ترفع الضغط !
ابويا : بــــــــــــس .. تمـــــــــــــــام .. هى الصورة كدة وحشة بارضو بس تتشاف !!

************************************
وانا جى اشيل السلم الخشب اللى طلعت بيه على السطح .. خبطت بالسلم فى الاريال وهـــــوب .. الاريال كان سبعتلاف حته فى قلب المنور !
ابويا : بـــــــــس ... كدة الصورة بقت مرايه !!!!!!!!!!!!!!!!!!!!!!!!!!!!!!!!!
امى بعد ماشافت اللى حصل من شباك المطبخ : مراية ايه ياراجل .. الموكوس ابنك طوح الاريال فى المنور !!
ابويا : يانهارك اسود .. طب والنبى لانت نازل جايبة وطالع مركبة تانى ..!
انا : طب بس سؤال ...
ابويا : عايز ايه ؟؟
انا : انت عايز انهى حته فى الاريال بالظبط !!
ابويا سمع السؤال ده وراح بص من الشباك ورجع بقرارا عاجل : بـــــــــــــــــــــــره !
عموما انا دلوقتى مستقر فى الكشك بتاع عم سالم البواب اللى عملهولى جنب الكشك بتاعه من كثرة اعتياده على هذه المواقف !
وانا حاليا بكلمكوا من على اللابتوب بتاعه !

هو انا كل ما اكلم حد فى البيت يقولى برة؟؟